你有慨嘆過「減極都唔瘦」嗎？就算做運動和節食雙管齊下，都好似減唔到肥。即使有啲成效，好快又會反彈。究竟如何減肥先至真正有效呢？
首先，有心減肥又肯努力郁動，其實已經成功咗一半！但可能差少少竅門，令到效果唔顯著，不如參考下以下6個減肥秘訣，或者可以助你減肥事半功倍！
1. 唔好過度運動
如何減肥？不是調整飲食就是做運動啦！的確，做運動令人精神爽利，體格強健。如果你踏出第一步，又發現自己身形愈來愈苗條，很自然會加大運動量。畢竟，運動量越大，卡路里消耗便越高，何樂而不為呢？
不過要注意的是，原來過度運動會有反效果！太高運動量和缺乏適當休息，會增加中樞神經系統負荷，令身體產生過多的壓力荷爾蒙，提高身體脂肪儲藏量，無疑增加減肥難度…
所以，想成功減肥，就要喺運動同休息之間取得平衡。
2. 保持睡眠充足
和上一點類似，如果睡眠不足，你嘅身體會出現類似過度運動症狀。壓力荷爾蒙水平會上升，令新陳代謝減慢，阻礙減肥進度。如果你狂做運動又唔夠瞓，簡直就係同減肥講拜拜。
所以，建議大家每日保持7至8小時嘅瞓覺時間。要有好嘅睡眠質素，便要作息規律、睡前避免接觸藍光、午後至晚上唔好飲用含酒精和咖啡因飲品。記住：瞓得夠，精神好，先有本錢實踐減肥大計！
3. 唔好挨餓
講起如何減肥，好多人都以為食少啲就會瘦啲，原來大錯特錯！點解？原來又係壓力荷爾蒙喺度作怪。
人體脂肪其實好似後備燃料一樣，遇上緊急情況，就會被分解來提供熱量。
當你挨餓時，身體會發出緊急訊號，提升壓力荷爾蒙的水平。隨之而來，就係脂肪儲備嘅提升，身體會進入求生狀態，新陳代謝降低，減少熱量消耗。
呢個時候仲去減肥，就等如逆水行舟，何必呢？所以，追求苗條身形的同時，都要有適當的飲食，讓身體得到充足的養份，咁先唔會本末倒置。
4. 鍛鍊肌肉
如何減肥才能事半功倍？當然係鍛鍊肌肉啦！放心，唔係要你變成健美先生或女士，只是適量增加肌肉而已。
首先，重力訓練本身就會消耗大量卡路里，有助減肥。呢種高強度運動亦會調節體內的荷爾蒙分泌，達到運動後繼續燃脂嘅效果！
另外，肌肉本身擁有較高新陳代謝速度，所以經過鍛鍊後，身體在靜止時消耗熱量都會有所提高，呢種雙重嘅減肥效果，絕對不容忽視！
5. 攝取足夠蛋白質
相信大家對蛋白質都好熟悉，但除咗增加肌肉，蛋白質關減肥咩事呢？
原來，蛋白質有好高嘅產熱效應，身體係消化和吸收蛋白質的過程中，會消耗大量嘅卡路里。另外，蛋白質比碳水化合物同脂肪更加可以促進新陳代謝，幫助身體消耗更多熱量和脂肪儲備。
最後，有研究顯示蛋白質有助增加飽肚感，減少進食份量。至於如何用蛋白質減肥，大家可以係早餐入面加多隻蛋或其他蛋白質食物，一方面提高蛋白質的攝取量，另一方面減低零食和甜食對自己的誘惑。
6. 控制飲食
留意食物熱量，是減肥人士必做。但想準確計算熱量的吸收並非想像中咁容易，因為卡路里會受食物的種類、烹調方式、消化時耗用的能量所影響。我們每天記錄飲食中的熱量，粗略了解自己的情況，再作調整。
不可不提的，就是停止「飲用熱量」。無論是汽水、果汁、運動飲品、珍珠奶茶和精品咖啡皆避之則吉。事關飲品中熱量來得快，去得快，完全沒有飽肚感。而且多數飲品都是高糖份，會令血糖急升，提升饑餓感出現，絕對是減肥人士嘅大敵！
