【片皮鴨都有得外賣?】令人回味的香港片皮鴨中菜館@金公館

早排因為小小豬要測驗關係,除左要閉關宅在家之外,仲謝絕一切探訪。咁測驗完就係時候輕鬆一下,所以就叫左佢兩位至愛姨姨嚟屋企陪佢玩返夠本。既然兩個妹嚟陪玩,我都要好好招待一下先得,照理係應該煮返餐正嘢嘅,不過我又好想食片皮鴨同酸菜魚,平日三個人又唔可以叫得太多(怕食唔晒浪費嘛),今日人多啲就可以叫多啲,於是就搵左間叫「金公館」嘅中菜館,「金公館」連片皮鴨都有得叫外賣返屋企食,於是就決定試下,等小小豬又有多啲時間同姨姨們玩~

金公館

我最期待就當然係烤片皮鴨,今次就叫左半隻,依款片皮鴨亦都香港金公館嘅招牌菜嚟。老實講我都係第一次食片皮鴨外賣(印象中片皮鴨外賣香港都好似冇乜店舖做),估唔到又有點驚喜。

雖然係片皮鴨外賣但絕對唔會馬虎,佢嘅份量都好充足,有齊青瓜絲、京蔥絲同埋醬汁配料,而且佢個餅皮都唔會厚身,而且佢每片餅皮之間都會夾住一塊牛油紙,咁拎嘅時候既方便又唔會將啲餅皮"痴"到一舊舊~

片皮鴨

片皮鴨當然最重點就係啲鴨肉,唔知係唔係由正宗四川師傅主理關係,佢嘅刀功真係超利害,鴨片下真係唔多覺有太多脂肪,撇走左鴨皮中間嘅油脂,咁就食起嚟更加啱注重健康之香港人(話事話...咁薄片嘅片皮鴨係香港都第一次食到呀)~

咁薄片嘅片皮鴨

片皮鴨外賣返到屋企嗰個鴨皮都依然好酥脆,再加埋個嫩滑嘅鴨肉,配上甜麵醬同清新爽口嘅青瓜同大蔥用餅皮包住一齊食,食落油香味好重之餘,但又一啲油膩嘅感覺都無,真係好味到唔停得口~

片皮鴨外賣

當然要到金公館嘅另一招牌菜式,就係老壇子酸菜魚,估唔到佢地外賣嘅份量一啲都唔少,要用兩大個圓盒盛載先夠,真係份量十足~

片皮鴨外賣

我個人覺得酸菜魚最重要就當然係個湯汁,佢個麻辣味好出,但食落辣得嚟又唔會嗆喉,依個先係最正地方。可能係因為材料同辣椒都是來自四川 ,而啲 酸菜都係以傳統老壇及秘制香料醃制,所以特別出色。

魚肉片新鮮嫩滑得嚟又唔會有骨,所以都可以好放心咁大啖食。不過,除左魚片之外,千其唔漏左鍋底還有萵苣、水晶粉同大量酸菜依啲配料,因為佢地都一樣好夠味呀~

魚肉片新鮮嫩滑

清洗豬肺都係一件勁麻煩嘅事,每個過程都用好多工夫,所以就算我自己成日煲湯,都唔敢自己整,再者香港供應依款湯水嘅餐廳都唔多,所以依度有就當然要叫 青城山杏汁豬肺湯 嚟飲下啦!

奶白色嘅湯都好清甜,而且都入面材料都非常豐富,基本上每一碗湯都有齊豬肺、雞腳、白菜膽同金華火腿粒,真係清淡滋潤得嚟又令人非常回味~

奶白色嘅湯

依個蒜泥白肉嘅豬肉都唔錯~

蒜泥白肉

薄薄的五花肉片加上青瓜片,再配上蒜醬汁及芝麻一齊食,口感同味道都令人非常有驚喜呢~

薄薄的五花肉片加上青瓜片

最後就嚟一個招牌口水雞~

招牌口水雞

一打開外賣盒就已經聞到佢嗰一陣勁香嘅麻辣味,雞肉鮮嫩滑身夠入味,最鐘意就係佢嗰一陣麻辣味香而不太辣,而且佢份量都好足,超正呀~ 

招牌口水雞

今次真係可以話係川菜外賣大發現,原來係香港叫外賣都一樣可以有好好嘅體驗,尤其係嗰個片皮鴨真係令人超級回味,有機會都要再叫過,咁宅在家中都可以食好西啦!

(轉載自: http://www.kinseymama.com/)